Mae'r Aelod o'r Senedd, Paul Davies, wedi galw am weithredu ar frys ynghylch ystadegau sy'n dangos bod 63.3% o'r llwybrau cleifion a aseswyd fel rhai sydd â'r risg uchaf o niwed na ellir ei wrthdroi yn disgwyl y tu hwnt i'w dyddiad targed ar gyfer triniaeth yn ardal Bwrdd Iechyd Prifysgol Hywel Dda. Mae'r ffigyrau diweddaraf gan Lywodraeth Cymru’n dangos bod 11,295 o gleifion yn ardal Bwrdd Iechyd Prifysgol Hywel Dda yn wynebu'r risg uchaf o niwed na ellir ei wrthdroi yn sgil disgwyl y tu hwnt i'w dyddiad targed am driniaeth.
Meddai Mr Davies, “Mae'r ystadegau hyn yn hynod frawychus ac wrth eu gwraidd mae miloedd o bobl sy'n byw yn y Gorllewin sydd mewn perygl o golli golwg na ellir ei wrthdroi oherwydd eu bod yn disgwyl yn rhy hir am eu hapwyntiadau. Nid yn unig fod llawer o'r cleifion hyn mewn poen ac anghysur, ond mae rhai wedi colli swyddi oherwydd bod eu golwg yn dirywio hefyd.
“Mae angen gweithredu ar frys ac rwy'n pwyso ar Lywodraeth Cymru i gymeradwyo'r Strategaeth Glinigol Genedlaethol ar gyfer Offthalmoleg a blaenoriaethu ei gweithredu. Mae gwasanaethau gofal llygaid yn dal i fod dan bwysau enfawr, mae ei seilwaith yn gofyn am fuddsoddiad sylweddol ac mae yna broblemau recriwtio a chadw difrifol. Felly, mae'n hanfodol bod hyn yn cael ei flaenoriaethu ar unwaith – gan fod pob mis sy'n mynd heibio heb ymrwymiad i wella gofal llygaid yn arwain at ychwanegu mwy a mwy o bobl at restrau aros.”
Mae rhagor o wybodaeth yn:
Ystadegau Llywodraeth Cymru ar aros am ofal llygaid - Cleifion sy’n aros am apwyntiadau offthalmoleg cleifion allanol
RNIB Cymru - 04_A4_Priorities_for_Health_Social_Care_Eng.pdf (rnib.org.uk)
