Mae’r Aelod o’r Senedd dros Breseli Penfro, Paul Davies, wedi dangos ei gefnogaeth i fenywod â chanser yr ofari ar draws y rhanbarth mewn digwyddiad arbennig yn y Senedd ar 23 Mawrth. Rhoddwyd cyfle i Aelodau o'r Senedd wisgo fel "arwyr gwyrddlas" i godi ymwybyddiaeth o symptomau canser yr ofari, mewn digwyddiad a drefnwyd ar gyfer Mis Ymwybyddiaeth Canser yr Ofari ym mis Mawrth. Gwyrddlas (teal) yw lliw ymwybyddiaeth o ganser yr ofari, sy'n parhau i fod yn frawychus o isel yng Nghymru. Mae data gan yr elusen Target Ovarian Cancer yn dangos mai dim ond 27 y cant o fenywod yng Nghymru fyddai'n gallu enwi bol chwyddedig fel symptom o ganser yr ofari.
Meddai Mr Davies, "Mae dros 4,000 o fenywod yn y DU yn marw o ganser yr ofari bob blwyddyn, ac mae ymwybyddiaeth o'r symptomau allweddol yn parhau i fod yn rhy isel. Mae'r symptomau'n cynnwys teimlo'n llawn, bol wedi chwyddo'n barhaus, angen troethi'n amlach a/neu â mwy o frys a phoen stumog – ac felly os oes unrhyw un o'r symptomau hyn yn swnio'n gyfarwydd, yna cysylltwch â'ch meddyg teulu. Mae'n annhebygol bod eich symptomau'n cael eu hachosi gan broblem ddifrifol, ond mae'n bwysig gwirio. Rhaid i ni ddod at ein gilydd a gweithredu nawr i sicrhau bod pawb yn gwybod beth i gadw llygad amdano, a bod y rhai yr effeithir arnynt gan ganser yr ofari yn wynebu canlyniadau gwell. Dyna pam yr oeddwn yn falch o ymuno â chydweithwyr o bob rhan o'r gagendor gwleidyddol i gymryd rhan yn nigwyddiad Arwr Gwyrddlas (Teal Hero) eleni gyda'r elusen Target Ovarian Cancer i greu rhywfaint o gynnydd cadarnhaol.”
